Ditën e sotme, në Lushnje nënshkruam marrëveshjen për grante si një ndër 12 bashkitë fituese në kuadër të Programit të Përbashkët të Kombeve të Bashkuara “Askush Të Mos Mbetet Pas – LNB2”, i cili financohet nga Agjencia Zvicerane për Zhvillim dhe Bashkëpunim.
Në prani të Ministres së Shëndetësisë dhe Mbrojtjes Sociale znj.Albana Koçiu, Ambasadores së Zvicrës znj.Ruth Huber, Përfaqësueses së Përhershme të UNDP-së në Shqipëri znj.Monica Merino dhe Kryetarëve të Bashkive fituese u prezantuan projektet që do të sjellin shërbime të reja të kujdesit social , në përputhje me Ligjin 121/2016 dhe sipas Planit Social të secilës bashki.
Projekti i Bashkisë Përmet ka si qëllim “Të kontribuojë në përmirësimin e shërbimeve për moshën e tretë dhe të moshuarit e vetmuar” duke synuar rezultatet si mëposhtë:
Mobilimi dhe funksionalizimi i Qendrës ditore për moshën e tretë në qytetin e Përmetit.
Realizim i një databaze mbi nevojat e të moshuarve.
Realizim i aktiviteteve që nxisin pjesmarrjen dhe përfshirjen e moshës së tretë në qytetin e Përmetit.
Ofrimi i shërbimeve në banesë për të moshuarit që jetojnë vetëm etj.
Fokusi kryesor i projektit është të sigurojë që individët dhe grupet vulnerabël, të kenë qasje të përmirësuar në shërbimet publike që mbrojnë të drejtat e tyre sociale, të promovojë përfshirjen sociale, të forcojë mirëqenien dhe t’i fuqizojë ata të marrin pjesë aktivisht në proceset e vendimmarrjes së politikave publike që ndikojnë në jetën e tyre.

E mbyllëm ditën e sotme me punë të mira dhe në dobi të qytetit dhe qytetarëve.
Sektori i Mirëmbajtjes, Pastrimit dhe Rrugëve Rurale u angazhuan në pastrimin e mbetjeve inerte dhe urbane në lagjet dhe rrugicat e qytetit.
Në këtë fillim sezoni turistik është mirë që së bashku ti kushtojmë më tepër vëmendje kujdesit për mjedisin.
Pastrojmë shtëpinë nga plehrat dhe ndotim hapësirat e përbashkëta publike me mbetje inerte është impakti më negativ turistik që nuk i shkon një qyteti si i joni. Tregoni qytetari duke i hedhur mbetjet në vendin e duhur.
Ndërkohë Bashkia vijon punën duke kërkuar sensibilizimin e qytetarëve për të mbajtur pastër mjedisin, duke shmangur në këtë mënyrë edhe sanksionet që përcakton ligji për rastet e ndotjes së qytetit.

“THE LAST ADVENTURE OF EUROPE” NË PËRMET !
Duke ju uruar një ditë të mbarë , ju sjellim disa nga momentet dhe aktivitetet e eventit ``The Last Adventure of Europe`` të zhvilluar në Përmet.
Koncert nga artistët më të dashur , ngjitje, shtigje me biçikletë , eksplorim të natyrës, muzikë, lojëra për fëmijë ,rafting na shoqëruan gjatë kësaj fundjave plot aventura dhe argëtim.
Fundjava të tilla plot muzikë dhe adrenalinë na presin gjatë gjithë verës.

DITËN E VERËS JU MIRËPRESIM NË PËRMET !
Festa e madhe e Ditës së Verës e cila në MARS bën bashkë përmetar , vizitorë , turistë e miq të qytetit tonë për të mirëpritur pranverën dhe për të çelur sezonin turistik po afron.
Ju ftojmë të gjithëve ta kalojmë së bashku këtë ditë pranverore.

Në një atmosferë festive sot shkolla “Nonda Bulka” feston 115 vjetorin e krijimit si e para shkollë shqipe në Përmet.
Dikur shkolla “7 Marsi”, sot me krenari mban emrin e shkrimtarit dhe publicistit përmetar Nonda Bulka.
‍Mes mësuesve dhe nxënësve të brezave të ndryshëm, me organizimin e stafit aktual të shkollës, përcollën emocione, nostalgji dhe ndjenjë krenarie për cilindo që ka prekur bankat e kësaj shkolle.
Me mirënjohje Këshilli Bashkiak Përmet vlerësoi këtë institucion arsimor dhe disa prej mësuesve të parë që kontribuan në arsimin dhe edukimin e brezave me titullin “Mirënjohje e qytetit”.
Në këtë vatër arsimi, ndër vite është punuar me përkushtim, ndaj në këtë shekull të dytë ju urojmë suksese në vazhdimin e punës së palodhur në ndërtimin e dijeve dhe qytetarëve të denjë të së ardhmes.
Gëzuar 115 vjetorin shkolla “Nonda Bulka”!

Funksionimi i Klubit të Alpinizmit si një program i edukimit në natyrë dhe nxitjes së sporteve malore, bën bashkë fëmijët e Qendrës Kulturore të Fëmijëve dhe jo vetëm, në aktivitete sportive.
Instruktori i sportit të Alpinizmit ka përfshirë fëmijët në edukimin e këtij sporti duke realizuar ngjitje dhe mësim të teknikave të alpinizmit nëpërmjet lojrave.
Kështu ishin dhe aktivitetet e fundit në ngjitjen e realizuar në malin Dhëmbel dhe në Dardhë të Korçës duke zbuluar shtigje të reja dhe duke u argëtuar në shoqërinë e njëri-tjetrit.
Alpinizmi sfidon mendjen dhe trupin.
Bashkia Përmet mbështet dhe nxit çdo aktivitet në të mirë të një jete të shëndetshme për fëmijët.

Qendra Komunitare për fëmijët me nevoja të veçanta në bashkëpunim me QKF Përmet, në kuadër të Ditës Botërore të Autizmit #2Prill, organizuan një aktivitet artistik, duke përcjellë tek fëmijët dhe pjesëmarrësit mesazhe plot dashuri në këtë ditë të veçantë për fëmijët e veçantë.
Të kuptuarit e personave me autizëm është hapi i parë drejt ndërgjegjësimit të shoqërisë për të qenë më tolerantë dhe duke larguar barrierat të cilat i pengojnë këta persona të përfshihen.
Autizmi nuk është sëmundje.
”Unë jam autik dhe jetoj në botën time të vogël, në një botë me lule e ngjyra, gjuha e së cilës është ajo e zemrës.
Më duaj, vetëm në këtë mënyrë do të më kuptosh dhe do të më mësosh të kuptoj”.
Më shumë dashuri, përkushtim dhe mirëkuptim shoqëror.

21 Mars “ Dita Ndërkombëtare e Pyjeve” e gjen Sektorin e Pyjores, Gjelbërimit dhe Rrugëve Rurale me angazhimin maksimal dhe gjithëpërfshirjen në aksionin e pyllëzimit në kodrën e fshatit Kutal, zonë në të cilën prej disa kohësh mbillet për të zëvendësuar pemët e djegura para 3 vitesh.
Në kuadër të cilësimit si viti i pyjeve, Bashkia Përmet brenda këtij tre mujori ka mbjellë mbi 2000 pemë të reja.
I bashkohemi çdo ditë thirrjes për ruajtjen, zhvillimin e pyjeve dhe hapësirave të gjelbra.
Do të vijojmë me këtë ritëm për një mjedis më të pastër dhe të gjelbëruar.

21 shkurti është shpallur nga UNESCO si Dita Ndërkombëtare e Gjuhes Amtare.
Në kuadër të kësaj dite, nxënësit e QKF organizuan një aktivitet me poezi dhe sollën në vëmendje të gjithë patriotët dhe gjuhëtarët që dhanë një kontribut të shkëlqyer në ruajtjen e gjuhës shqipe.
Është detyrë e çdo nxënësi, mësuesi por dhe çdo institucioni për ruajtjen e gjuhës nga huazimet e panevojshme nga gjuhët e tjera.
Detyra jonë e përbashkët është: Ta duam, ta mbrojmë dhe promovojmë me krenari identitetin tonë, gjuhën shqipe!

Bashkia Përmet prezantoi Draftin e Planit të Menaxhimit të Mbetjeve në një dëgjesë publike ku morën pjesë antarë të Këshillit Bashkiak, Sektori i Shërbimeve, Sektori Pastrim-Gjelbërimit, qytetarë të angazhuar etj.
Pjesë e takimit ishte dhe pjesëmarrja e znj. Sabine Piccard, Shefe e qeverisjes dhe shëndetit në Ambasadën Zviceriane si dhe përfaqësues të projektit Bashki të Forta.
Pas konsultimit të draftit përfaqësuesja e ambasadës zhvilloi një takim me Kryetaren e Bashkisë për të diskutuar mbështetjen e deritanishme, vijimin e procesit deri në finalizimin e Planit si dhe asistencën e tyre të pamunguar për Bashkinë tonë.
Nëpërmjet këtij Plani arrijmë përmirësimin e performancës duke ndikuar në shërbime më cilësore për komunitetin dhe zgjidhje të qëndrueshme për problematikat e menaxhimit të mbetjeve.

100 PEMË DAFINE MBILLEN NË PARKUN KUPOLA !
rrënjë pemë dafine ju shtuan sot Parkut Kupola, në “Ditën e Inxhinierit të Pyjeve” duke iu bashkuar kështu Vitit të Pyjeve .
Në aksionin e mbjelljes së pemëve morrën pjesë punonjës të Sektorit të Gjelbërimit dhe punonjës të administratës.
Mirënjohje dhe respekt për punën e brezit të parë të inxhinierëve dhe të gjithë specialistëve të pyjeve që kanë kontribuar në Pylltarinë shqiptare.

Kinemaja e qytetit mirëpriti Cirkun i cili solli argëtim dhe një ditë ndryshe për fëmijët e qytetit tonë.
Fëmijët shoqëruan me brohoritje dhe duartrokitje numrat e mjeshtrit dhe artistit Mico Kasapi.
Përveç akrobacisë, gjallërinë e shtuan numrat me qenushë gjatë së cilave mjeshtri përfshiu edhe fëmijë nga salla.
Falenderim për mjeshtrin Mico Kasapi për këtë ditë argëtuese për fëmijët e qytetit tonë dhe që me kaq pasion mban gjallë këtë zhaner artistik në zhdukje.

Kjo datë shërben për promovimin e sportit dhe aktivitetit fizik, si gjuhë universale dhe mjet për edukimin, shëndetin, përfshirjen sociale, zhvillimin e rinisë dhe ndërtimin e një mjedisi bashkëpunues e paqësor.
Në kuadër të kësaj dite, ekipi i moshave U12 dhe U15 Përmet, zhvilluan ditën e sotme ndeshje futbolli me ekipin e moshave Luftëtari Gjirokastër.
Prioriteti jonë është mbështetja dhe nxitja e këtij sporti edhe për këto grupmosha.
Këto eksperienca për fëmijët synojnë jo vetëm pjesëmarrjen sociale, ndërgjegjësimin se sporti është shëndeti por edhe investimin për të ardhmen e kësaj disipline sportive.

Java nisi me një takim të rëndësishëm që u zhvillua me strukturat e Komisariatit të Policisë Përmet , Bashkisë dhe Agjencisë së Zonave të Mbrojtura në ambientet e Sallës së Këshillit Bashkiak në kuadër të luftës kundër trafikimit dhe kultivimit të kanabisit.
Ky takim vjen në vijim të punës së vazhdueshme të të gjithë organeve dhe strukturave përkatëse duke sjell një bashkëpunim të frytshëm.
Lufta kundër kanabisit është një punë këmbëngulëse jo vetëm e Policisë së Shtetit, por është një përpjekje e të gjithë institucioneve, ku policia ka rol kryesor, por edhe institucionet e tjera në pushtetin vendor, bashkia,njësitë administrative, kryepleqtë e fshatrave kanë rol të rëndësishëm në kontrollin e territorit.
Angazhimi i të gjitha këtyre strukturave
në kuadër të forcimit të kapaciteteve në drejtim të intensifikimit të përpjekjeve të përbashkëta të strukturave shtetërore në luftën kundër kultivimit të bimëve narkotike mbetet prioriteti ynë.

REHABILITIMI I DIGËS SË REZERVUARIT PACOMIT!
Rezervuari Pacomit është ndërtuar në vitin 1985 me një kapacitet ujëmbledhës prej 100000 m3 ujë dhe projektuar për të vaditur 1000 ha tokë bujqësore.
Ky objekt është lënë në harresë ndër vite dhe sot ndihet domosdoshmëria e investimit për rehabilitimin e këtij rezervuari, me qëllim mbajtjen në funksion normal pune dhe njëkohësisht përmbushjen e kritereve të sigurisë teknike.
Mungesa e mirëmbajtjes, amortizimi i materialeve, erozioni, kanë bërë që në objekt të shfaqen dëmtime te cilat rrezikojne seriozisht qëndrueshmërinë e digës dhe rrezikun e shembjes së saj në raste
rreshjesh të dendura duke rrezikuar fshatin Pacomit që ndodhet poshtë rezervuarit.
Tashmë kjo problematikë do të marrë fund falë investimit në rehabilitimin e digës me mbështetjen e Agjencisë Kombëtare të Mbrojtjes Civile dhe financim të qeverisë.
Investimi ka nisur në muajin tetor dhe pritet të përfundojë brenda muajit prill 2024.
Rehabilitimi i digës me të gjitha elementët e ndërhyrjes si punime skarifikimi, gërmime dheu, punime betoni, aksesi rrugës për në digë, shkarkuesi katastrofik , rrisin sigurinë për banorët e fshatit Pacomit si dhe sasinë e nevojshme për ujitjen e kulturave bujqësore të fermerëve të zonës. ‍

RIKTHIM I TEATRIT TË KUKULLAVE NË PËRMET!
Miqtë e vegjël të arsimit fillor, ditën e sotme morrën pjesë në shfaqjen “ Miushi që donte të kapte yllin”.
Një shfaqje e realizuar me shumë dëshirë dhe pasion nga znj. Teuta Sadiku, përmetare e rikthyer nga emigrimi por plot energji dhe dashuri për artin.
Miqtë e vegjël të teatrit aprovuan mes duartrokitjesh kënaqësinë, gëzimin dhe argëtimin në këtë ditë ndryshe.
Shfaqjet artistike aq të munguara dhe të dashura të fëmijëvë janë synimi i Bashkisë për t’ia rikthyerPërmetit.
Do të vijojmë ti bëjmë pjesë të kalendareve mujore të aktiviteteve në mënyrë që tradita e vjetër të kthehet sërish.